سه‌نته‌ری توێژینه‌وه‌ی زانكۆی پۆلیته‌كنیكی سلێمانی: فەندێک بەبڕی زیاد لە ١٢٠ هەزار دۆلاری ئەمەریکی لە زانکۆیەکی بەناوبانگی بەریتانی وەردەگرێت

  • ئه‌یلول 1, 2018
  • 721 Views
سه‌نته‌ری توێژینه‌وه‌ی زانكۆی پۆلیته‌كنیكی سلێمانی: فەندێک بەبڕی زیاد لە ١٢٠ هەزار دۆلاری ئەمەریکی لە زانکۆیەکی بەناوبانگی بەریتانی وەردەگرێت

پڕۆژە توێژینەوەیەکی سەنتەری توێژینه‌وه‌ی زانكۆی پۆلیته‌كنیكی سلێمانی، فەندێک بەبڕی زیاد لە ١٢٠ هەزار دۆلاری ئەمەریکی لە زانکۆیەکی بەناوبانگی بەریتانی وەردەگرێت.

لە بەردەوامی پەیوەندی و دەستکەوتە نێودەوڵەتیەکانی سه‌نته‌ری توێژینه‌وه‌ی زانكۆی پۆلیته‌كنیكی سلێمانی و به‌ڕێوه‌به‌ری سه‌نته‌ر(د. ڕۆژین کەمال محمدامین) دامەزرێنەر و سەرۆکی گروپی توێژینەوەی کەلەپووری کەلتووری دیجیتاڵی و مامۆستا لە بەشی پلانسازی شار لە زانکۆی پۆلیتەکنیکی سلێمانی (لەگەڵ هاوبەشەکانی لە زانکۆی پۆلیتەکنیکی سلێمانی و زانکۆکانی ڕێدینگ و لیستەر لە بەریتانیا) توانرا فەندێک بە بڕی زیاد لە ١٢٠ هەزار دۆلاری ئەمەریکی (سەرو ٩٣ هەزار پاوەندی بەریتانی) بۆ پڕۆژە توێژینەوەکەیان لە پێشبڕکێیەکی تۆڕی نەهرەینی زانکۆی University College London (UCL) ی بەناوبانگی بەریتانی بباتەوە.

پڕۆژە توێژینەوەکە سەبارەت بە دامەزراندنی یەکەم تۆڕی فرە پسپۆڕی و فرە ئاست و فرە تێڕوانینی بواری کەلەپووری کەلتووری و پاراستنی کەلەپووریە لە هەرێمی کوردستان بۆ پێک بەستنەوەی توێژەران و ئەکادیمیستان و پیشەییەکان لە ئەندازیارانی تەلارسازی و شوێنەوار ناسان و مێژووناسان و کەس و بوار و لایەنە پەیوەندیدارەکانی تر. ئامانجی پڕۆژەکە لێک نزیککردنەوەی پسپۆڕ و لایەنە پەیوەندیدارەکانە لە هەرێمی کوردستان بۆ دیاری کردنی ئاستەنگ و فرسەتەکانی بەردەم کەرتی کەلەپووری کەلتووری لە کوردستان دا بەمەبەستی دۆزینەوەی چارەسەر بۆ پاراستنیان بۆ نەوەکانی داهاتوو وە دروستکردنی هەلی کار و داهاتی نیشتمانی بۆ هەرێمی کوردستان و عێراقیش لەو کەرتەوە. بۆ ئەو مەبەستە بەشێکی گەوەری پڕۆژەکە تایبەتە بە کۆکردنەوەی زانیاری و ئەنجام دانی ڕاپرسی و شیکردنەوەی یاسا و ڕێنماییە پەیوەندیدارەکان لە ڕێگەی فۆکەس گروپ و ۆرک شۆپ و پەیوەندی کردن بە کەس و لایەنی پەیوەندیدار. بەشێکی تری پڕۆژەکە تایبەتە بە ڕاهێنانی هاوچەرخی توانای توێژینەوە و پیشەیی ئەندامانی تۆڕەکە لەسەر دەستی پسپۆڕی ناوخۆیی و بەریتانی و نێودەوڵەتی تر بۆ بەرەو پێشبردنی کار و خزمەتەکانی کەرتی کەلەپووری کەلتووری لە هەرێمی کوردستان دا. پڕۆژە یەک ساڵیەکە بواری ڕاهێنان و هەلی کاریش بۆ سێ گەنجی دەرچووی زانکۆی پۆلیتەکنیک دابین دەکات کە دانەمەزراون لە دەزگاکانی حکومەت.

بیرۆکەی تۆڕە کەلەپووری کەلتووریەکە لە لایەن د. سەعد ئەسکەندەر (مێژووناس و نوسەری نێودەوڵەتی و ڕاوێژکاری گروپی توێژینەوەی کەلەپووری کەلتووری دیجیتاڵی) ەوە سەرەتا پێشنیار کرا بۆ د. ڕۆژین و دیزاینی چالاکیەکانی پڕۆژەکە و نوسین و پێشکەش کردنی پڕۆپۆزەڵی پڕۆژەکە و پاشان ئەنجامیدا. جگە لەوان، بەڕێزان د. ئالان فەرەیدوون (سەرۆکی زانکۆی پۆلیتەکنیکی سلێمانی) و پرۆفیسۆر ڕۆجەر ماسیۆس (لە زانکۆی ڕێدینگی بەریتانی) و پرۆفیسۆر روث یەنگ (لە زانکۆی لیستەری بەریتانی) ئەندامی تیمی بەڕێوەبردنی پڕۆژەکەن.

شایەنی باسە کە ئەمە سێهەم پڕۆژەیه‌ كه‌ به‌ هاوبەشی نێوخۆیی و نێودەوڵەتی دا لەماوەی کەمتر لە ساڵێکدا توانراوه‌ فەندی نێودەوڵەتی بەدەستبهێنن. لە مانگی ١١ ی ٢٠١٧ دا فەندێکی هاوبەشی د. ڕۆژین لەگەڵ زانکۆی ڕێدینگی بەریتانی و هاوبەشەکانی تری توانی فەندێکی پرۆگرامی ئیراسمۆسی یەکێتی ئەوروپی بە بڕی ٦٤ هەزار یۆرۆ بۆ ئاڵوگۆڕی ستافی ئەکادیمی و ڕاهێنان بەدەستبهێنێت. وە لە مانگی ٥ ی ئەمساڵدا پڕۆپۆزەڵەکە بە هاوبەشی مۆزەخانەی سلێمانی و بەڕێوەبەرایەتی شوێنەواری سلێمانی و ڕێکخراوی RASHID ی ئەڵمانی (کە تیایدا ڕۆڵی سکرتێری بۆردی هەیە) بۆ ئەنجامدانی توێژینەوەیەک و دروستکردنی گەلەریەکی پێش مێژوو لە مۆزەخانەی سلێمانی، توانی فەندێک بە بڕی ٥٠ هەزار دۆلار وەربگرێت لە سەفارەتی ئەمەریکا لە بەغداد.

بۆ خوێندنەوەی اعلانی فەرمی پڕۆژەکە لە وێبسایتی زانکۆیUCL ی بەریتانی، بفەرموون بە سەردانکردنی ئەم لینکە:
https://www.ucl.ac.uk/…/nahrein-network-announces-first-fun…