كەناڵی SPUHD پەخشی ئاسایی خۆی دەستپێدەكاتەوە

  • ئاب 29, 2019
  • 230 Views
كەناڵی SPUHD پەخشی ئاسایی خۆی دەستپێدەكاتەوە

دوای پشووی هاوینەی زانكۆ و خۆئامادەكردن بۆ وەرزێكی نوێ و بەشداری پێكردنی كارای مامۆستایان و خوێندكاران لە بەرنامەكاندا، رۆژی یەكشەممە 2019/9/1 سەعات 7ی ئێوارە، تەلەفزیۆنی زانكۆی پۆلیتەكنیكی سلێمانی ( SPUHD ) دەست بە پەخشی ئاسایی خۆی دەكاتەوە.

ئارام بەكر بەڕێوەبەری تەلەفزیۆنی زانكۆی پۆلیتەكنیكی سلێمانی ( SPUHD ) رایگەیاند: بەهۆی پشووی هاوینەی زانكۆو خۆئامادەكردنمان بۆ وەرزێكی نوێ و هەروەها وەك دەرفەتێك بۆ پێداچوونەوە بە بەرنامە و پرۆگرامەكان و بەشداری پێكردنی كارای مامۆستایان و خوێندكاران لەبەرنامەكاندا پەخشی كەناڵەكەمان بۆ ماوەیەكی كاتی راگرت، هەربۆیە دوای جێبەجێكردنی پلان و كارەكانمان بڕیارمانداوە، رۆژی یەكشەممە 2019/9/1 سەعات 7ی ئێوارە دەست بە پەخشی ئاسایی كەناڵەكە بكەینەوە.

شایەنی باسە تەلەفزیۆنی زانكۆی پۆلیتەكنیكی سلێمانی ( SPUHD ) لە رێكەوتی 2019/1/31 بەئامادەبوونی د.یوسف گۆران وەزیری پێشووی خوێندنی باڵا و توێژینەوەی زانستی دەستی بەپەخشی ئەزموونی كرد و لە ماوەیەكی كورتدا هەنگاوێكی گەورەی هەڵگرت بە ئاراستەی خزمەتكردنی زانست و پرۆسەی خوێندن و پەخشكردنی سەرجەم چالاكییە زانستییەكان، لەئێستاشدا كەناڵەكە خاوەنی ستۆدیۆیەكی كرۆمی فراوانە كە بە كوالێتییەكی بەرزو بەشێوازێكی سەردەمیانە دیزاین كراوەو لەئاستی ستانداردی میدیایی جیهانیدایە، كە دروستكردنی ئەم ستۆدیۆیە هەنگاوێكی دیكەی گرنگ دەبێت بەئاڕاستەی بەرەوپێشبردنی زیاتری كەناڵەكەو سوود گەیاندن بەخوێندكارانی تەكنیكی میدیا.