سیمینارێكی گرنگ بۆ خوێندكارانی دەرچووی 12 ئامادەیی بەڕێوەچوو

  • ئه‌یلول 4, 2019
  • 195 Views
سیمینارێكی گرنگ بۆ خوێندكارانی دەرچووی 12 ئامادەیی بەڕێوەچوو

بەئامانجی ڕونكردنەوەو بەرچاوو ڕوونی خوێندكارانی دەرچووی 12 ی ئامادەیی، كۆمەڵەی خوێندكارانی كوردستان بەهاوكاری شارەزایان لە زانكۆی پۆلیتەكنیكی سلێمانی و زانكۆی سلێمانی هەستا بە سازدانی سیمینارێك بۆ خوێندكارانی دەرچووی 12 ی ئامادەیی لەسەر ڕونكردنەوەی سیستمەكانی وەرگرتنی ( زانكۆلاین، كریدیت،ڕاستەوخۆ، پارالێڵ،ئێواران) كە لەلایەن بەڕێزان د. بختیار عبید شریف لەزانكۆی پۆلیتەكنیكی سلێمانی و د.چۆمان عمر لەزانكۆی سلێمانی بەڕێوەچوو.

لەسیمینارەكەدا چەندین زانیاری بەسوود خرایە ڕوو كە لە قازانجی خوێندكارانەو وا دەكات خوێندكار نەكەوێتە هەڵەوە لە پڕكردنەوەو دیاریكردنی ئەو بەشە زانستییانەی كە ئارەزووی دەكات یان لەگەڵ كۆنمرەكەیدا یەك دەگرێتەوە.

پڕكردنەوەی فۆڕم و پێشكەشكردنی داواكاری خوێندكاران هاوشێوەی ساڵانی ڕابردوەو بەشێوەی ئۆنلاین پڕدەكرێتەوە و داواكرا لە قوتابیان و خوێندكاران كە لە ناوەندو دەزگا نا فەرمییەكان فۆرمەكان پڕنەكەنەوەو پێویستە لەڕێگەی سەنتەری ڕاوێژكاری زانكۆكانەوە ڕێنمایی تەواو وەربگرن چونكە بەهەڵە پڕكردنەوەی فۆرم و داواكارییەكان داهاتووی خوێندكاری پێوە بەندە. لەسیمینارەكە ئەوە خرایە ڕوو كە كۆنمرەی خوێندكار سەنگی مەحەكە بۆ وەرگیرانیان لەو شوێنانانەی ئارەزویان لێیەتی، ڕایانگەیاند كە لەهەرێمی كوردستاندا 14 زانكۆی حكومی هەیەو 574 بەشیان لەخۆگرتووە كە 331 بەشیان كۆدی ژمارە 1 ی وەرگرتوەو تایبەتە بە دەرچووانی بەشی زانستی و 34 بەش كۆدی ژمارە 2 ی وەرگرتوەو تایبەتە بە دەرچوانی بەشی وێژەیی وە 209 بەشیش هاوبەشە كە زانستی و وێژەیش وەردەگرێت و 4 بەشیش هەیە كە بەچاوپێكەوتن و تاقیكردنەوە(اختبار) خوێندكار وەردەگرێت.

د. بختیار عبید شریف لەزانكۆی پۆلیتەكنیكی سلێمانی و د.چۆمان عمر لەزانكۆی سلێمانی ڕایانگەیاند كە ئەمساڵ خوێندكاران دەتوانن لە هەردوو زانكۆی حكومی و ئەهلیش فۆرم  پڕبكەنەوە و ئەو خوێندكارانەی پارساڵ لەهیچ شوێنێك ناویان نەهاتۆتەوە بۆ ئەمساڵ دەتوانن فۆرم پێشكەش بكەن.

لەكۆتایی سیمینارەكەدا ناوبراوان داوایان لەخوێندكاران كرد كە لەكاتی پڕكردنەوەی فۆرمەكاندا زۆر بەووریاییەوە كاری تیادا بكەن و پێویستە خوێندكار 50 هەڵبژاردە كەمتری نەبێت. لەكۆتاتییدا بەچەندین پرسیاری خوێندكاران كۆتایی بە سیمینارەكە هات.

مەرجەكانی وەرگرتنیش بریتین لە :

خوێندكار دەبێت ڕەگەزنامەی عێراقی بێت و تەمەنی لە 30 ساڵ زیاتر نەبێت و دەرچووی ئامادەیی بێت.

بۆ بینینی ئەم سیمینارە دەتوانن شەوی پێنج شەمە 5ی ئەیلولی 2019 لەكەناڵی SPUHD كەناڵی زانكۆی پۆلیتەكنیكی سلێمانی لە نێو ئامێری میكس میدیا / كەناڵە لۆكاڵییەكان بینەری بن یان لەڕێگەی پەیجی فەرمی فەیسبوكی زانكۆی پۆلیتەكنیكی سلێمانییەوە بەم ئەدرەسە:

https://www.facebook.com/SulaimaniPolytechnicUniversitySPU/