كۆنفرانسی مینا لە عومان دەستیپێكرد

  • ئه‌یلول 15, 2019
  • 210 Views
كۆنفرانسی مینا لە عومان دەستیپێكرد

بە بەشداری شاندێكی باڵای وەزارەتی خوێندنی باڵا و توێژینەوەی زانستی هەرێمی كوردستان، كۆنفرانسی مینا بۆ ساڵی 2019 لە مەسقەتی پایتەختی شانشینی عومان بەڕێوەدەچێت.

لەلایەن وەزارەتی خوێندنی باڵای عومانەوە بۆ بەشداریكردن لە كۆنفرانسەكە بانگهێشتی بەڕێز د.ئارام محەمەد قادر وەزیری خوێندنی باڵا و توێژینەوەی زانستی كراوە و لەلایەن بەڕێزیانەوە شاندێكی وەزاری پێكهێنراوە لە بەڕێزان ( پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی، پ.ی.د.لزگین عبدی سەرۆكی زانكۆی زاخۆ، د.سیروان ساڵح سەرۆكی زانكۆی گەرمیان و د.جوان جەلال شەریف بەڕێوەبەری گشتی نێردراوان و پەیوەندییە رۆشنبیرییەكانی وەزارەت ) كە وەك نوێنەری وەزارەتی خوێندنی باڵا و توێژینەوەی زانستی بەشدارن لە كۆنفرانسەكەدا.

پ.ی.د.ئالان فەرەیدون عەلی ئەمین وەك سەرۆكی زانكۆی پۆلیتەكنیكی سلێمانی ئەندامی شاندەكەی وەزارەتی خوێندنی باڵایە و بەشدارە لە كۆنفرانسەكەدا لە لێدوانێكدا بە سایتی زانكۆی راگەیاند: سوپاسی بەڕێز د.ئارام محەمەد قادر وەزیری خوێندنی باڵا و توێژینەوەی زانستی و وەزارەت دەكەین بۆ بەشداریكردن لەم جۆرە كۆنفرانسانەدا كە گرنگی تایبەتی هەیە لە بواری خوێندنی باڵا و دۆزینەوەی رێگای نوێ و شێوازی فێركردن لە زانكۆ و پەیمانگاكاندا ئەویش بە بەكارهێنانی تەكنەلۆجیای زانیاری و ئامێری ئەلیكترۆنی ئاست بەرز و شێوازی نوێ كە گونجاو بێت لەگەڵ پێداویستی هاوچەرخی ئێستای پرۆسەی خوێندن و فێركردندا.

شایەنی باسە كۆنفرانسی مینا بۆ داهێنان لە خوێندن، ساڵانە لەسەر ئاستی رۆژهەڵاتی ناوەڕاست و باكووری ئەفریقا بەڕێوەدەچێت، بۆ ئەمساڵیش لە وڵاتی عومان بە بەشداری 21 وڵات و 250 كەسایەتی لەسەر ئاستی وەزیری و بریكاری وەزیر و سەرۆكی زانكۆ و بڕیاربەدەستی خوێندنی باڵا و پەروەردە، لەگەڵ زیاتر لە 40 زانكۆ و دەزگای بەناوبانگی خوێندنی باڵا لە وڵاتانی عەرەبی و ناوچەكە و جیهان بەڕێوەدەچێت.