سەرۆكی زانكۆی پۆلیتەكنیكی سلێمانی: تا خوێندكاران لێمان رازی بن ئێمەش باشتر دەتوانین ئەركی خۆمان جێبەجێ بكەین

  • ئه‌یلول 22, 2019
  • 230 Views
سەرۆكی زانكۆی پۆلیتەكنیكی سلێمانی: تا خوێندكاران لێمان رازی بن ئێمەش باشتر دەتوانین ئەركی خۆمان جێبەجێ بكەین

بەبۆنەی دەستپێكردنەوەی ساڵی نوێی خوێندن و ئاگاداربوون لە ئامادەكارییەكان بۆ پێشوازیكردن لە خوێندكاران، پرۆفیسۆری یاریدەدەر د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی سەردانی كەمپی كۆلێجە تەكنیكییەكان و پەیمانگای تەكنیكی سلێمانی كرد و رایگەیاند: لە زانكۆماندا خوێندكاران سەنتەرن، بۆیە تا لێمان رازی بن ئێمەش باشتر دەتوانین كارەكانمان جێبەجێ بكەین.

ئەمڕۆ یەكشەممە 2019/9/22 بەڕێز پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی بەیاوەری پ.د.سۆران ئەبوبەكر یاریدەدەری سەرۆكی زانكۆ بۆ كاروباری زانستی و خوێندنی باڵا و پ.ی.د.دانا ئەحمەد یاریدەدەری سەرۆكی زانكۆ بۆ كاروباری دارایی و كارگێڕی و ئارام بەكر بەڕێوەبەری كەناڵی SPUHD سەردانی كەمپی كۆلێجە تەكنیكییەكانی چوارچرای كرد و لەگەڵ راگری كۆلێجەكانی ( تەكنیكی كارگێڕی و تەكنیكی ئەندازیاری ) و مامۆستیان كۆبوویەوە، لە كۆبوونەوەكەدا بە وردی باس لە پلانی ئەمساڵی خوێندن و ئەو ئامادەكاریانە كران كە بۆ پرۆسەی ئەمساڵی خوێندن جێبەجێكراون، وە لەنزیكەوە سەرۆكی زانكۆی پۆلیتەكنیكی سلێمانی گوێی لە پێشنیار و داواكاری هەردوو راگری كۆلێجی تەكنیكی كارگێڕی و تەكنیكی ئەندازیاری گرت و بەڵێنیدا داواكارییەكانیان بكرێنە تەوەری گفتوگۆی كۆبوونەوەی ئەنجومەنی زانكۆ و بخرێنە بواری جێبەجێكردنەوە، هەروەها سەرۆكی زانكۆی پۆلیتەكنیكی سلێمانی سوپاسی سەرجەم مامۆستایان و فەرمانبەرانی زانكۆی كرد كە سەرەڕای بوونی قەیرانی ئابووری دڵسۆزانە و خەمخۆرانە درێژەیان بە خزمەتكردن داوە و نەیاهێشتووە پرۆسەی خوێندن لە زانكۆكەیاندا بوەستێت.

لە بەشی دیكەی كۆبوونەوەكەدا پ.ی.د.ئالان فەرەیدون عەلی ئەمین رایگەیاند: لە زانكۆی پۆلیتەكنیكی سلێمانیدا خوێندكاران سەنتەرن و تا ئەوان لێمان رازی بن ئێمەش باشتر دەتوانین كارەكانمان جێبەجێ بكەین، بۆیە دەبێت بەوپەڕی توانامانەوە لە خزمەتی خوێندكاراندا بین و هەموو هەوڵێك بدەین بە دابینكردنی سەرجەم كەلوپەل و پێداویستییەكانی خوێندن و فەراهەمكردنی كەشێكی لەبارو گونجاو تا خوێندكاران بە ئاسوودەیی بخوێنن و بەسەركەوتوویی ئەمساڵی خوێندن تێپەڕێنن.

لەمیانی بەسەركردنەوەی بەشەكانی كۆلێجە تەكنیكییەكاندا پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی چاوی بە چەند خوێندكارێك كەوت و پیرۆزبایی دەستپێكردنەوەی ساڵی نوێی خوێندنی لێكردن و لەنزیكەوە گوێ بیستی داواكارییەكانیان بوو وە بەڕێزیان بەڵینیدا هەموو هەوڵێك بخەنەگەڕ بۆ پێشخستنی پرۆسەی خوێندن بەتایبەتی بواری تەكنیكی پیشەیی تا كادری بەتوانا و شارەزا بخەنە بازاڕی كارەوە.

دواتر پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی بەهاوڕێیەتی وەفدی یاوەری سەردانی پەیمانگای تەكنیكی سلێمانی ( پەیمانگای دایك)ی كرد و لەگەڵ سەرجەم سەرۆك بەشی پەیمانگاكە كۆبۆوە و باسیان لە پلانی ئەمساڵی خوێندن و ئامادەكاریەكان كرد بۆ پێشوازیكردن لە خوێندكاران و پێشخستنی پرۆسەی خوێندن لە پەیمانگاكە.

لە كۆتاییشدا سەرجەم سەرۆك بەشەكانی پەیمانگای تەكنیكی سلێمانی بەئاڕاستەی خزمەتكردنی زیاتر و بەرەوپێشبردنی پرۆسەی خوێندن لە پەیمانگاكەیان داواكاری و پێشنیارەكانیان خستە بەردەم سەرۆكی زانكۆ و لەلایەن بەڕێزیشیانەوە بەڵێنی جێبەجێكردنیان درا.