وەزیری خوێندنی باڵا لەگەڵ یەكەمەكانی زانكۆكانی كوردستان كۆبۆوە

  • ئه‌یلول 24, 2019
  • 306 Views
وەزیری خوێندنی باڵا لەگەڵ یەكەمەكانی زانكۆكانی كوردستان كۆبۆوە

وەزیری خوێندنی باڵا و توێژینەوەی زانستی بە یەكەمەكانی زانكۆكانی ڕاگەیاند: من خۆم بە باڵیۆزی داواكارییەكەی ئێوە دەزانم و لەسەرەتای كاركردنماندا دامەزراندنی ئێوە لە ئەولەویەتمان دابووە، دڵنیاشتان دەكەم داكۆكیكاری داواكاریەكەتان دەبم.

ئەم وتانەی د.ئارام محەمەد قادر وەزیری خوێندنی باڵا و توێژینەوەی زانستی لەمیانی پێشوازیكردنی لە یەكەمەكانی زانكۆكانی هەرێم هات كە سێشەممە ڕێككەوتی (٢٤/٩/٢٠١٩) سەردانی وەزارەتی خوێندنی باڵا و توێژینەوەی زانستییان كردبوو.

د.ئارام محەمەد قادر لەمیانی دانیشتنی لەگەڵ یەكەمەكانی زانكۆكانی هەرێم ڕایگەیاند: ئێمە وەك وەزارەت لەسەرەتای كاركردنماندا بە نووسراوی فەرمی داوای دامەزراندنی ئێوەمان كردووە، چونكە زانكۆكان پێویستیان بەتوانا و لێهاتوویی ئێوەیە بۆ راییكردنی كاروبارە زانستی و كارگێڕییەكانی زانكۆكان.

وەزیری خوێندنی باڵا وتیشی لێژنەیەكی تایبەت پێكهێنراوە بۆ دیراسەكردنی ئەم بابەتە و لە نزیكترین كاتیشدا بە بەشداری نوێنەری یەكەمەكانی زانكۆ كۆبوونەوەیەك بەڕێوەدەچێت، هەروەها وتی: بۆ پاڵپشتی داوای ئێوە نامەیەكی جەختكردنەوە ئاراستەی سەرۆكایەتی ئەنجومەنی وەزیران دەكەین.

لەبەرامبەریشدا یەكەمەكانی زانكۆكانی هەرێم سوپاسی دڵسۆزی و خەمخۆری وەزیری خوێندنی باڵا و توێژینەوەی زانستییان كرد وەك داكۆكیكارێك لە داوا رەواكانیان و هەمیشە پاڵپشتی و پشتیوانیانە بۆ چارەسەری كێشەكەیان و دامەزراندنیان.

بەڕێوەبەرایەتی ڕاگەیاندنی وەزارەت