زانكۆی پۆلیتەكنیكی سلێمانی چالاكییە كەلەپووریی و كلتوورییەكانی دەباتە سەرای سلێمانی

  • ئه‌یلول 29, 2019
  • 45 Views
زانكۆی پۆلیتەكنیكی سلێمانی چالاكییە كەلەپووریی و كلتوورییەكانی دەباتە سەرای سلێمانی

لە مەراسیمێكی شایستەدا كردنەوەی هۆڵێك و دوو ژووری تایبەت بە زانكۆی پۆلیتەكنیكی سلێمانی لە بینای سەرای سلێمانی بەڕێوەچوو كە بۆ لەمەودوا زانكۆ چالاكییە كەلەپووریی و كلتوورییەكانی لەم شوێنە مێژووییەی شاری سلێمانیدا ئەنجام دەدات.

سەرلەبەیانی رۆژی شەممە 2019\9\28 بەئامادەبوونی حاكم قادر حەمەجان ئەندامی دەستەی كارگێڕی مەكتەبی سیاسی ی.ن.ك و ئازاد محمد امین سەرۆكی ئەنجومەنی پارێزگای سلێمانی و پ.ی.د.ئالان فەریدون عەلی ئەمین سەرۆكی زانكۆی پۆلیتەكنیكی سلێمانی و پ.د.سۆران ئەبوبەكر یاریدەدەری سەرۆكی زانكۆ بۆ كاروباری زانستی و پ.ی.د.دانا ئەحمەد یاریدەدەری سەرۆكی زانكۆ بۆ كاروباری كارگێڕی و دارایی و ژمارەیەك لە راگران و مامۆستایانی زانكۆ، مەراسیمی كردنەوەی هۆڵێك و دوو ژووری تایبەت بە زانكۆی پۆلیتەكنیكی سلێمانی لە بینای سەرای سلێمانی بەڕێوەچوو كە بۆ لەمەودوا زانكۆ چالاكییە كەلەپووریی و كلتوورییەكانی لەم شوێنە مێژووییەی شاری سلێمانیدا ئەنجام دەدات، وە لە هەماهەنگیەكدا گرووپی (دی سی ئێچ ) لە زانكۆی پۆلیتەكنیكی سلێمانی بەهاوبەشی ( یەكەی كەلەپووری زانكۆی ڕاپەڕین و ڕێكخراوی لاوانی سۆشیاڵ دیموكراتی كورد) هەستا بە ڕێكخستن و سپۆنسەركردنی چالاكیەكی كولتووری مێژوویی كراوە.

سەرەتای مەراسیمەكە بە ساتێك وەستان بۆ گیانی پاكی شەهیدان دەستپێكرد، پاشان د.رۆژین كەمال سەرۆكی گرووپی توێژینەوەی كەلەپووری كلتووری دیجیتاڵی لە سەنتەری توێژینەوەی زانكۆی پۆلیتەكنیكی سلێمانی باسی لە گرنگی پرۆژەكە كرد و رایگەیاند هێنانی چالاكییەكانی زانكۆ بۆ ناو بینایەكی مێژوویی وەك سەرای سلێمانی گرنگییەكی تایبەتی هەیە ئەویش بە بەستنەوەمان بە كۆمەڵگەوە و ئەنجامدانی چالاكی كلتووری و كەلەپووریی لە رێگەی سیمپۆزیۆم و سیمینار و وۆركشۆپ و پێشانگا و هتد…. ، د.رۆژین كەمال وتیشی سوپاسی بەڕێوەبەرایەتی رۆشنبیری سلێمانی دەكەین كە زۆر هاوكارمان بوون و رەزامەندییان دەربڕی بە پێدانی هۆڵێك و دوو ژوور بۆ ئەنجامدانی چالاكییەكانمان.

پاشان پ.ی.د.ئالان فەریدون عەلی ئەمین سەرۆكی زانكۆی پۆلیتەكنیكی سلێمانی وتەیەكی پێشكەشكرد و وتی زانكۆی پۆلیتەكنیكی سلێمانی هەمیشە باوەڕی بە تێكەڵبوونی زانكۆ هەیە لەگەڵ كۆمەڵگا و بوون بە بەشێك لە پێداویستی خەڵك، بۆیە كەلەپووری كلتووری سلێمانی پاراستنی مێژووی سلێمانی ئەركی سەرشانی هەموومانە، وە پاراستنی تایبەتمەندی پایتەختی رۆشنبیری ئەركێكی گەورەیە و دەبێت هەموومان پێكەوە كاری بۆ بكەین كە زانكۆی پۆلیتەكنیكی سلێمانی بەشانازییەوە بەشێكە لە جێبەجێكردنی ئەو ئەركە.

لەهەر لە وتەكەیدا پ.ی.د.ئالان فەریدون عەلی ئەمین وتی ئەمڕۆ دەسپێكێكە بۆ ناساندنی مێژووی سلێمانی بەشێوازێكی نوێ لەگەڵ زانكۆكانی دەرەوە، وە دەستكەوتێكی دیكەی زانكۆیە دەخرێتەڕوو، سوپاسی بەڕێوەبەری گشتی رۆشنبیری و پارێزگای سلێمانی دەكەین بۆ هاوكاریكردنیان لەم ئەركە نوێیەدا، وە سوپاسی گرووپی توێژینەوەی كەلەپووری كلتووری دیجیتاڵی لە سەنتەری توێژینەوە و مامۆستایان و فەرمانبەران و خوێندكارانی زانكۆمان دەكەم كە هەمیشە خەمخۆری پێشكەوتنی زانكۆن.

لە وتەیەكیدا حاكم قادر حەمەجان ئەندامی دەستەی كارگێڕی مەكتەبی سیاسی ی.ن.ك وەكو دڵسۆزێكی شاری سلێمانی سوپاسی زانكۆی پۆلیتەكنیكی سلێمانی كرد كە هەستاوە بە گرتنە ئەستۆی ئەم ئەركە پیرۆزە، وە ئومێدی سەركەوتنی بۆ ئەو لیژنە و كەسانە خواست كە هاوكار بوون لەم پرۆژەدا، لە بەشێكی دیكەی وتەكەیدا حاكم قادر حەمەجان وتی ئەم هەنگاوانە بۆ خزمەتی شارەكەمان و میللەتەكەمان گرنگە، ژیاندنەوە كەلەپوری هەرێمەكەمان ئەركمانە كە پێكەوە بەشێوەیەكی مۆدێرن و سەردەمانە بتوانین هەنگاو بنێین.

پاشان لەلایەن د.رۆژین كەمال سەرۆكی گرووپی توێژینەوەی كەلەپووری كلتووری دیجیتاڵی لە سەنتەری توێژینەوەی زانكۆی پۆلیتەكنیكی سلێمانی سیمینارێك لەبارەی گرووپی توێژینەوەی كەلەپووری كلتووری دیجیتاڵی پێشكەشكرا و كارو چالاكییەكانی چەند ساڵی رابردووی گرووپەكەی خستەڕوو.

دواتر لە هەماهەنگیەكدا گرووپی (دی سی ئێچ ) لە زانكۆی پۆلیتەكنیكی سلێمانی بە (هاوبەشی یەكەی كەلەپووری زانكۆی ڕاپەڕین و ڕێكخراوی لاوانی سۆشیاڵ دیموكراتی كورد) هەستا بە ڕێكخستن و سپۆنسەركردنی چالاكییەكی كولتووری مێژوویی كراوە.

لە چالاكییە هاوبەشەكەدا، یاری پاشاكانی ئور كە كۆنترین یاری مێژووییە لە میزۆپۆتامیادا زیندوكرایەوە و شێوازی یاری كردنەكە بە ئامادەبووان ئاشناكران، وە لە كەشێكی كولتوورییدا ئامادەبووان لەگەڵ خێزان و هاوڕێكانیان و خۆبەخشەكانی زانكۆی پۆلیتەكنیكی سلێمانی و زانكۆی ڕاپەڕین و ڕێكخراوی لاوانی سۆشیاڵ دیموكراتی كورددا یاریەكەیان ئەنجامدا.

لە كۆتایی مەراسیمەكەشدا پێشانگایەكی تابلۆ كە لەلایەن زانكۆی پۆلیتەكنیكی سلێمانی و زانكۆی ڕاپەڕین و ڕێكخراوی لاوانی سۆشیاڵ دیموكراتی كوردەوە ئامادەكرابوون نمایشكران.

شایەنی باسە پڕۆژەی تۆڕی كەلەپووری كولتووری نێودەوڵەتی پڕۆژەیەكی هاوبەشی گرووپی توێژینەوەی كەلەپووری كلتووری دیجیتاڵی زانكۆی پۆلیتەكنیكی سلێمانی و دوو زانكۆی بەڕیتانیە (زانكۆكانی ڕێدینگ و لیستەر) بە سپۆنسەری دارایی و فەندی تۆڕی نەهرەینی زانكۆی (یو سی ئێڵ) ی بەڕیتانی بەڕێوەدەچێت.