كارپێكردنی سیستمی ئەلیكترۆنی بەشەناوخۆییەكانی خوێندكاران راگەیەندرا

  • تشرینی یه‌كه‌م 1, 2019
  • 876 Views
كارپێكردنی سیستمی ئەلیكترۆنی بەشەناوخۆییەكانی خوێندكاران راگەیەندرا

لەسەر داوای بەڕێوەبەرایەتی بەشەناوخۆییەكانی زانكۆی پۆلیتەكنیكی سلێمانی بۆ بە ئەلیكترۆنی كردن و ئۆنلاین كردنی بەڕێوەبەرایەتییەكەیان، سێ خوێندكاری زانكۆ هەستان بە دروستكردنی داتابەسێك بۆ بەشەناوخۆییەكان.

ئەمڕۆ یەكشەممە 2019/10/1 لە هۆڵی پیرەمێردی سەرۆكایەتی زانكۆی پۆلیتەكنیكی سلێمانی و بەئامادەبوونی پ.ی.د.دانا ئەحمەد یاریدەدەری سەرۆكی زانكۆ بۆ كاروباری كارگێڕی و دارایی و لێپرسراوانی بەشەناوخۆییەكانی كۆلێج و پەیمانگاكانی سەر بە زانكۆ، لەلایەن هەرسێ خوێندكار ( ئوسامە كەمال ئەحمەد، شەنیار موختار محەمەد، بەستە سۆران خەسرەو ) لە بەشی داتابەسی پەیمانگای تەكنیكی كۆمپیوتەر، سیمینارێك لەسەر چۆنێتی كارپێكردن و داخڵكردنی داتا و زانیارییەكان بۆ ناو سیستمی داتابەیسی بەشەناوخۆییەكان بۆ ئامادەبووان خرایەڕوو.

لە سەرەتادا پ.ی.د.دانا ئەحمەد یاریدەدەری سەرۆكی زانكۆ بۆ كاروباری كارگێڕی و دارایی كاركردنی بەشەناوخۆییەكانی بەم سیستمە ئەلیكترۆنییە بە گرنگ لەقەڵەمدا و هەموو پشتیوانی و هاوكارییەكی سەرۆكی زانكۆی بۆ پاڵپشتی خوێندكاران و بەرەوپێشبردنی كاروبارەكانی بەشەناوخۆییەكان دووپاتكردەوە.

لە لێدوانێكیشدا بۆ سایتی زانكۆمان خوێندكار ئوسامە كەمال ئەحمەد ئاماژەی بە سوود و گرنگی سیستمە ئەلیكترۆنییەكە كرد و رایگەیاند: ئەم سیستمە ئۆنلاینە و هەموو كاتێك بەردەستە بۆ بەكارهێنان تەنها ئەدمین لە سەرۆكایەتی زانكۆ دەتوانێت هەموو زانیاری و داتاكانی ناو سیستمەكە ببینێت و گەڕان لەناو سیستمەكەدا ئەنجام بدات، وتیشی: زانیاری تەواوی ئەو خوێندكارانەی تێدایە كە لە كۆلێج و پەیمانگاكانی سەر بە زانكۆمان دەخوێنن و لە بەشەناوخۆییەكاندا نیشتەجێ دەبن، وە هەر هۆبەیەكی بەشەناوخۆییەكان بەكارهێنەر و وشەی تێپەڕی تایبەت بەخۆی هەیە كە داخلی سیستمەكە دەبێت.

خوێندكار ئوسامە كەمال ئەحمەد وتیشی: پلان هەیە لە داهاتوودا ئەم سیستمە بخرێتە پاڵ سیستمی تۆماری گشتی زانكۆی پۆلیتەكنیكی سلێمانی و لەكاتی وەرگرتنی خوێندكاراندا راستەوخۆ ئەو خوێندكارانی لە بەشەناوخۆییەكان دەمێننەوە داخڵی سیستمەكە بكرێن.