رێنماییەكانی ماستەر و دكتۆرا و ئەنجامی وەرگرتنی خوێندكارانی 12ی ئامادەیی پەسەندكران

  • تشرینی یه‌كه‌م 7, 2019
  • 1111 Views
رێنماییەكانی ماستەر و دكتۆرا و ئەنجامی وەرگرتنی خوێندكارانی 12ی ئامادەیی پەسەندكران

ئەنجومەنی وەزارەتی خوێندنی باڵا و توێژینەوەی زانستی رێنماییەكانی ماستەر و دكتۆرا و ئەنجامی وەرگرتنی خوێندكارانی 12ی ئامادەیی پەسەندكرد، وەزیری خوێندنی باڵا و توێژینەوەی زانستیش رایگەیاند: بەپەسەندكردنی رێنماییەكانی ماستەرو دكتۆرا لەمەودوا لە رێگەی پلانەكانی خوێندنەوە دەرفەتی زیاتری خوێندنی باڵا بۆ دەرچووانی زانكۆكانمان لە ناوخۆی هەرێمی كوردستان دەڕەخسێنین.

رۆژی یەكشەممە رێكەوتی (٦/١٠/٢٠١٩) ئەنجومەنی وەزارەت بەسەرۆكایەتی د. ئارام محەمەد قادر سەرۆكی ئەنجومەن و ئامادەبوونی سەرۆك زانكۆ حكومییەكان كۆبوونەوەی تەواوكاری ژمارە (٥) ساڵی ٢٠١٩ی لە شاری سلێمانی ئەنجامداو چەند تەوەر و بابەتێكی پەیوەست بە پێشخستنی رەوشی خوێندنی باڵای كوردستان بڕیاریان لێوەدرا. لە گرنگترین بڕیارەكانی ئەنجومەنی وەزارەت:

– كۆنووسی لیژنەی سێنتەرەكانی زمان پەسەندكرا:

سەبارەت بە پەسەندكردنی كۆنووسی لیژنەی سەرپەرشتیكردنی سێنتەرەكانی زمان بەمەبەستی پێداچوونەوە بە مەرج و ڕێنماییەكانی زمانی ئینگلیزی لە كاروباری زانستی و خوێندنی باڵا و سەرپەرشتی كردنی كاروباری سێنتەرەكان، ئاماژە بۆ ئەوە كرا كۆنووسەكان لە بەرژەوەندی خوێندكاران و هەموو ئەو كاندیدانەیە كە سەرقاڵی ئەم پرۆسەیەن، بۆ ئەمەش سەرۆكی لیژنەی پێداچوونەوە بە ڕێنمایەكانی زمانی ئینگلیزی ئاماژەی پرۆگرامەكانی خوێندن و تاقیكردنەوەی دیاریكردنی ئاست و خولی ڕاهێنان و ئەنجامدانی تاقیكردنەوەی كۆتایی و هەڵسەنگاندنی كۆتایی خولەكان و تاقیكردنەوەی كۆتایی و دانانی پرسیار و لیژنەی تاقیكردنەوەكان و لیژنەی راستاندن و گازاندە و كاتی ئەنجامدانی تاقیكردنەوەكانی كۆتایی كردو بۆ ئەندامانی ئەنجومەنی وەزارەتی خستەڕوو.

– رێنماییەكانی كردنەوەی خوێندنی ماستەر و دكتۆرا پەسەندكرا:

لەبارەی كردنەوەی خوێندنی باڵا/ ماستەر و دكتۆرا لە زانكۆكانی هەرێمی كوردستان، دوای راگۆڕینەوەی ئەندامانی ئەنجومەنی وەزارەت و گفتوگۆكردن لەسەر یەكە بە یەكەی بڕگە و مادەكانی پەیوەست بە پوختەی رێنماییەكانی ماستەر و دكتۆرا لەوانە (مەرجی تێكرای نمرە (معدل)، مەرجی توانستی زمانی ئینگلیزی، مەرجی تاقیكردنەوەی توانستی زانستی، مەرجی تەمەن، مەرج و پێداویستی كردنەوەی ماستەر و دكتۆرا لە زانكۆكان، پێشكەشكاری دەرەوەی شارەكانی هەرێمی كوردستان و دەرەوەی عێراق، پێداویستییە زانستییەكانی خوێندن، پلان و ژمارەی كورسیەكان … هتد ) تاوتوێكران، دواتریش ئەنجومەنی وەزارەتی خوێندنی باڵا و توێژینەوەی زانستی ڕێنماییەكانی ماستەرو دكتۆرای پەسەندكرد.

بۆ پەسەندكردنی رێنماییەكانیش د. ئارام محەمەد قادر وەزیری خوێندنی باڵا و توێژینەوەی زانستی ڕایگەیاند: لەمەودوا و لەڕێگەی پلانەكانی خوێندنی ماستەر و دكتۆراوە دەتوانین دەرفەتی زیاتری خوێندنی باڵا بۆ دەرچووانی زانكۆكانمان لە ناوخۆی هەرێمی كوردستان دەڕەخسێنین بۆ ئەوەی بتوانن كاتەكانتان بەكار بهێنن بۆ گەشەپێدانی توانای زانستی و ئەكادیمییان.

وابڕیارە لە داهاتوویەكی نزیكدا و دوای پوختكردنی رێنماییەكان بەو گۆڕانكارییانەی لە كۆبوونەوەكەدا بڕیاری لێدران بڵاوبكرێنەوە، بۆ ئەوەی خوازیاران بتوانن ئاشنای تەواوی رێنماییەكان بن و خۆیان بۆ خوێندنی ماستەر و دكتۆرا ئامادە بكەن.

– ئەنجامی وەرگرتنی خوێندكارانی 12ی ئامادەیی پەسەندكرا:

لە بەشێكی دیكەی كۆبوونەوەكەدا ئەنجامی وەرگرتنی خوێندكاران/ قوتابیانی قۆناغی 12ی ئامادەیی لە زانكۆ و پەیمانگەكانی هەرێمی كوردستان بۆ ساڵی نوێی خوێندنی (٢٠١٩-٢٠٢٠) پەسەندكرا، بڕیاریشە لە داهاتوویەكی نزیكدا ئەنجامی وەرگرتن رابگەیەندرێت.

لە بەشێكی دیكەی كۆبونەوەكەدا چەند بابەت و تەوەرێكی دیكەی پەیوەست بە بواری زانستی و خوێندكاران و كارگێڕی پەیوەست بە زانكۆكان و دامەزراوە زانستیەكانی هەرێمی كوردستان و داواكاری و پێشنیازی مامۆستاو فەرمانبەر و هاوڵاتیان گفتوگۆی لەبارەوە كراو بەپێی پەیوەندی و لە چوارچێوەی یاسا و ڕێنماییە كارپێكراوەكان بڕیاریان لێدرا.