سەرۆكی زانكۆ لەگەڵ بەڕێوەبەران و ژمارەیەك لە فەرمانبەرانی سەرۆكایەتی زانكۆ كۆبوویەوە

  • تشرینی یه‌كه‌م 10, 2019
  • 929 Views
سەرۆكی زانكۆ لەگەڵ بەڕێوەبەران و ژمارەیەك لە فەرمانبەرانی سەرۆكایەتی زانكۆ كۆبوویەوە

بەمەبەستی خۆئامادەكردن و پێشوازیكردن لەساڵی نوێی خوێندن و نەهێشتنی رۆتین لەگشت ناوەندە كارگێڕییەكانی زانكۆی پۆلیتەكنیكی سلێمانی، پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی بەئامادەبوونی هەریەك لەبەڕێزان پ.د.سۆران ئەبوبەكر یاریدەدەری سەرۆكی زانكۆ بۆ كاروباری زانستی و پ.ی.د.دانا ئەحمەد یاریدەدەری سەرۆكی زانكۆ بۆ كاروباری دارایی و كارگێڕی، لەگەڵ بەڕێوەبەری بەڕێوەبەرایەتییەكان و ژمارەیەك لەفەرمانبەرانی سەرۆكایەتی زانكۆ كۆبوویەوە.

لەسەرەتای كۆبوونەكەدا پ.ی.د.ئالان فەرەیدون عەلی ئەمین دەستخۆشی لەبەڕێوەبەرو فەرمانبەرانی سەرۆكایەتی زانكۆ كرد كە ساڵی رابردوو دڵسۆزانەو خەمخۆرانە پابەندبوون بەكاتەكانی دەوامكردنەوەو بەردەوامبوون لەخزمەتكردنی خوێندكاران و پرۆسەی خوێندنی باڵا لەهەرێمەكەمان، هەروەها پیرۆزبایی دەستپێكردنەوەی ساڵی نوێی خوێندنی لەتەواوی ئامادەبووان كردو رایگەیاند، ئەمساڵ زانكۆمان زیاتر لە 6 هەزار خوێندكاری لەبەیانیان و ئێواران وەرگرتووە، كە ئەمەش رێژەی زیاترە لە 15%ی خوێندكارانی وەرگیراو لەزانكۆ حكومییەكانی هەرێمی كوردستان، بۆیە جێگەی شانازییە زانكۆمان ئەو رێژە زۆرەی خوێندكاری وەرگرتووەو هەلی خوێندنی رەخساندووە، بۆیە داواتان لێدەكەم چی لەتوانایاندایە درێغی نەكەن و ئەنجامی بدەن بۆ كەمكردنەوەی رۆتینات و باشتر بەڕێوەچوونی كارەكانی خوێندكاران و مامۆستایان لەزانكۆكەماندا.

سەرۆكی زانكۆی پۆلیتەكنیكی سلێمانی رایگەیاند: بۆ ئەمساڵ لە 40 بەشی زانستی زانكۆ بۆ خوێندنی ئێواران خوێندكار وەرگیراوەو كە دابەشبووە بەسەر هەشت پەیمانگادا. لەبەشێكی دیكەی كۆبوونەوەكەدا بەچڕوپڕی گفتوگۆ لەسەر ئەو پلان و بەرنامانە كرا كە دانراون و پێشنیاركراون بۆ بۆ باشتر ئەنجامدانی كاروبارەكان و پابەندبوون بەدەوامكردن بەپێی رێنماییەكان و ئەو نووسراوانەی لەوەزارەتەوە ئاڕاستەی زانكۆ كراون و گشتاندن بۆ سەرجەم كۆلێج و پەیمانگاكان كراوە، هەورەها باس لەو خزمەتگوزارییانە كرا كە لەماوەی پشووی هاوینەدا ئەنجامدراون، لای خۆشیانەوە هەریەك لەبەڕێوەبەران و فەرمانبەرانی سەرۆكایەتی زانكۆ بەڵێنیاندا تەواوی هەوڵەكانیان بخەنەگەڕ بۆ بە ئەنجام گەیاندنی ئەو پلان و پرۆگرامانەی كە لەلایەن سەرۆكایەتی و ئەنجومەنی زانكۆوە پێشنیاركراون.

لەوبارەشەوە سەبریە كەریم بەڕێوەبەری كارگێڕی لەسەرۆكایەتی زانكۆ بەساتی زانكۆی راگەیاند: سەرۆكی زانكۆ هەمیشە هاوكارو پشتیوانمان بووە بۆ راییكردنی كارەكان و كەمكرنەوەی رۆتینات لەزانكۆدا، وە هەمیشە بەئاڕاستەی خزمەتكردنی زیاتری خوێندكاران و پێشخستنی ئاستی زانستی و تەكنیكی زانكۆ كاری كردووە، وەك ئاشكرایە لەم چوار ساڵەی رابردوودا زانكۆ هەنگاوی گەورەی ناوە لەئەنجامدانی چالاكییە نێودەوڵەتییەكان و كاری زانستی هاوبەش لەگەڵ زانكۆو ناوەندە ئەكادیمییەكانی ناوەوەو دەرەوەدا.

دانا محەمەد كەریم بەڕێوەبەری خزمەتگوزاری لەسەرۆكایەتی زانكۆ ووتی: لەم كاتەدا دابینكردنی سوتەمەنی زۆرگرنگە بۆ زانكۆمان كە لیژنەیەك كاریكردووە بۆ تەخمینی سەرەتای پێداویستی ئەمساڵ لەسووتەمەنیی، وە بە نووسراوێكیش بەرزمانكردۆتەوە بۆ سەرووی خۆمان بەمەبەستی دابینكردنی بودجەی پێویست بۆ كڕینی بڕی سووتەمەنی پێویست كە پرۆسەی خوێندن لە 10\1 تا كۆتایی مانگی حوزەیران بەردەوام دەبێت، بەڕێوەبەری خزمەتگوزاری زانكۆ وتیشی: بەپێی ئەو خەمڵاندنانەی كراوە ساڵانە زیاتر لە 700 ملیۆن دینار پێویستە بۆ سووتەمەنی سەرجەم كۆلێج و پەیمانگان و بەشەناوخۆییەكانی خوێندكاران.

سەبارەت بەكاروباری دارایی و مووچەی ئێوارانی فەرمانبەرانی زانكۆ شارۆ ئاوات بەڕێوەبەری دارایی لە سەرۆكایەتی زانكۆ وتی: مانگانە زیاتر لە 140 ملیۆن دینار دراوە بەمووچەی فەرمانبەرانی ئێواران و زیاتر لە 300 ملیۆن دیناریش دراوە بەكرێی وانەبێژی ئێواران لەو كۆلێج و پەیمانگایانەی خوێندنی ئێوارانی تێدا خوێندراوە كە ئەم بڕە پارانە مانگانە لەسندوقی داهاتی زانكۆ خەرجكراوە بەپێی رێنمایی ژمارە 86، بەڕێوەبەری دارایی سەرۆكایەتی زانكۆ وتیشی: بەپێی رێنمایی نوێ و بەهۆی گەڕانەوەی سەرجەم داهاتەكان بۆ وەزارەتی دارایی، مانگانە كاردەكەین بۆ تەمویلكردنی مووچەی ئێوارانی فەرمانبەران و كرێی وانەبێژی، هیوادارین وەزارەتی دارایی هاوكارمان بێت بۆ بەردەوامبوونی پرۆسەی خوێندن بۆ باشتر خزمەتكردنی خوێندكاران.