هەڵەبجە: پێشانگای ساڵانەی بەرهەمە کشتوکاڵییەکان کرایەوە

  • تشرینی یه‌كه‌م 17, 2019
  • 378 Views
هەڵەبجە: پێشانگای ساڵانەی بەرهەمە کشتوکاڵییەکان کرایەوە

ئەمڕۆ پینج شەممە 17 ی تشرینی یەكەمی 2019 بە بەشداری كێڵگەی كشتوكاڵی كۆلێجی زانستە پراكتیكییەكانی هەڵەبجە سەر بەزانكۆی پۆلیتەكنیكی سلێمانی و بەسەرپەرشتی بەڕێوەبەرایەتی گشتی كشتوكاڵی پارێزگای هەڵەبجە و بەئامادەبوونی وەزیری كشتوكاڵ و سەرچاوەكانی ئاوی حكومەتی هەرێمی كوردستان و پارێزگاری هەڵەبجە ، پێشانگای ساڵانەی بەربومی كشتوكاڵی خۆماڵی لە شاری هەڵەبجە كرایەوە.

د.کارزان عبدالله ڕاگری کۆلێجی زانستە پراكتیكییەكانی هەڵەبجە بە سایتی زانكۆی ڕاگەیاند: ساڵانە لە وەرزی پایزو پێگەیشتنی هەناردا ئەم جۆرە چالاكییە بەڕێوەدەچێت كە مەبەست لێ ی نیشاندانی بە روبومی کشتوکاڵی جوتیارانە كە جۆرەها بەربومی خۆماڵی ناوچەكە نمایش دەكرێت ، لەلایەكی تریشەوە هەنگاوێكی ئەرێنییە بە ئاراستەی دروستكردنی بازاڕ بۆ جوتیاران و ساغ كردنەوەی بەرهەمەكان، ڕاگری کۆلێجی زانستە پراكتیكییەكانی هەڵەبجە ئاماژەی كرد بەوەی كە ساڵانە بەشی كێڵگە كشتوكاڵییەكانی كۆلێجەكەیان بەشداری كارا لەم ڤیستیڤاڵەدا دەكەن و بۆ ئەمساڵیش بەرهەمەكانی خۆیان نمایش دەكەن لەگەڵ 120 جوتیاری خاوەن بەربومی ناوچەكە، باسی لە هەماهەنگی بەردەوام و كردنەوەی خولی زانستی كرد بۆ بەڕێوەبەرایەتی كشتوكاڵی هەڵەبجە، ڕایگەیاند لە ڕووی دابینكردنی چەند پێداویستییەكی پێشانگاكەو دابینكردنی توانای مرۆیی بەشداری كارامان هەبوە ، مەبەستی بەشداریكردنی كۆلێجی تەكنیكی زانستە پراكتیكییەكانی هەڵەبجەی بۆ دوو لایەن گەڕاندەوە ئەوانیش خستنە ڕووی ئەو بەروبومانەی كە بەشێوازێكی زانستییانە لە كێڵگەكانی كۆلێجەكەیان بەرهەمی دێنن كە زۆربەیان خوێندكاران دەستیان لە چاندن و نەش و نما كردن و پێگەیاندنیاندا هەیە ، وەلایەنی دووەم ناساندنی كۆلێجی زانستە پراكتیكییەكانی هەڵەبجەیە بە ئامادەبوان سەردانیكەرانی پێشانگا ساڵانەكە.

پێشانگای ساڵانەی بەروبومی كشتوكاڵی لەهەڵەبجە گرنگی دەدات بە بوارەکانی (باخداری، خزمەتگوزاری کشتوکاڵی و بەروبومە ئاژەڵییەكان و کاری دەستی خانمان و خواردنی خۆماڵی و هەموو بەرهەمە کشتوکاڵییەکان) و ساڵانە بەرپرسانی كشتوكاڵی و میوانێكی زۆری ناوخۆیی و دەرەكی ئامادەی بینینی پێشانگاكە دەبن .