بەسەرپەرشتی وەزیری خوێندنی باڵا كۆبوونەوەیەك بۆ پێداچوونەوە بە رێنماییەكانی بەرزكردنەوەی پلەی زانستی بەڕێوەچوو

  • تشرینی یه‌كه‌م 28, 2019
  • 486 Views
بەسەرپەرشتی وەزیری خوێندنی باڵا كۆبوونەوەیەك بۆ پێداچوونەوە بە رێنماییەكانی بەرزكردنەوەی پلەی زانستی بەڕێوەچوو

رێنماییەكانی بەرزكردنەوەی پلەی زانستی لە زانكۆكانی كوردستان بەشێوەیەك پێداچوونەوەی بۆ دەكرێت لەگەڵ گۆڕانكاریی و پێداویستیەكانی ئەمڕۆ و داهاتووی بواری زانست لە كوردستان بگونجێت و، بەرزكردنەوەی پلەی زانستیش مانای بڵاوكردنەوەی توێژینەوەی زانستی و بەشداریكردن لە بەرهەمهێنانی زانست و مەعریفە بێت.

ئەمڕۆ دووشەممە ڕێكەوتی 2019/10/28 بەسەرپەرشتی د.ئارام محەمەد وەزیری خوێندنی باڵا و توێژینەوەی زانستی و سەرۆك لێژنەكانی بەرزكردنەوەی پلەی زانستی لە زانكۆكان، كۆبوونەوەی پێداچوونەوە بە رێنماییەكانی بەرزكردنەوەی پلەی زانستی لە دیوانی وەزارەت بەڕێوەچوو.

لەسەرەتای كۆبوونەوەكەدا، د.نەژدەت ئاكرەیی بەڕێوەبەری گشتی فەرمانگەی توێژینەوە و پەرەپێدان لە وتەیەكدا كورتەیەكی لەبارەی هەنگاوەكانی پێداچونەوە بە ڕێنماییەكانی پلەی زانستی لە زانكۆكانی كوردستان كرد و، ئاماژەی بە وردەكاری هەموارەكە بۆ ئامادەبوان خستەڕوو كە لەماوەی كۆبوونەوەكانیان لە لیژنە پێداچونەوەیان بە ڕێنماییەكان كردوە و، پەسەندكراوە.

لە بەرامبەردا، وەزیری خوێندنی باڵا و توێژینەوەی زانستی لە وتەیەكدا خۆشحاڵی خۆی نیشاندا بە ئامادەبون لە كۆبونەوەیەكی گرنگی تایبەت بە پێداچونەوە بە ڕێنماییەكانی بەرزكردنەوەی پلەی زانستی لە زانكۆكانی هەرێمی كوردستان، بۆ ئەمەش وتی: بابەتی بەرزكردنەوەی پلەی زانستی بابەتێكی زانستی و پسپۆڕی گرنگە و پەیوەندی ڕاستەوخۆی بە ئاستی زانستی و ئەكادیمی و پێشكەوتویی زانكۆكانمانەوە هەیە، بۆیە پێویستە لە ڕێنماییەكانداو بەتایبەت لە ڕێنمایی بەرزكردنەوەی پلەی زانستی، بابەتی شەفافەیەت و بەرزكردنەوەی زانستی ڕەنگبداتەوەو رۆتینیاتی تێدا نەبێت.

وەزیری خوێندنی باڵا وتیشی: سەرجەم بڕگەكانی ئەو ڕێنماییە پێویستە رەنگدانەوەی ئەو كۆنسێپتە بێت كە بەرزكردنەوەی پلەی زانستی مانای چالاكی بڵاوكردنەوەی توێژینەوەی زانستی و بەشداریكردنی ڕەسەن و ڕاستەقینە لە بەرهەمهێنانی زانست و مەعریفە بێت.

جێگەی ئاماژەیە لە پێداچوونەوە بە ڕێنمایی بەرزكردنەوەی پلەی زانستی لە زانكۆكانی هەرێمی كوردستان تەوەری پلە زانستیەكان و مەرجەكانی هەڵگرانی پلەی مامۆستایی یاریدەدەر و مامۆستاو پرۆفیسۆری یاریدەدەر و پرۆفیسۆر و مەرجەكانی ئەو توێژینەوانەی كە بۆ بەرزكردنەوەی پلەی زانستی پێشكەش دەكرێن خراوەتەڕوو، هەروەك مەرجەكانی گۆڤاری مەحكەم و چەند بڕگە و مادەیەكی دیكەی پەیوەست بە بەرزكردنەوەی پلەی زانستی لە هەموارەكە بەهەند وەرگیراوە.

بەڕێوەبەرایەتی راگەیاندنی وەزارەت