خوێندكارانی سنوری شارۆچكەی پێنجوێن دەتوانن لە شارەكەی خۆیاندا درێژە بە خوێندن بدەن

  • تشرینی دووه‌م 4, 2019
  • 827 Views
خوێندكارانی سنوری شارۆچكەی پێنجوێن دەتوانن لە شارەكەی خۆیاندا درێژە بە خوێندن بدەن

بەمەبەستی فراوانتركردنی ناوەندو بەشەزانستییەكان و خزمەتكردنی خوێندكارانی ئەو شارانەی سنوری پارێزگای سلێمانی و هەڵەبجەو ئیدارەی گەرمیان، زانكۆی پۆلیتەكنیكی سلێمانی لەپاش هەوڵێكی زۆر توانی ڕەزامەندی وەزارەتی خوێندنی باڵاو توێژینەوەی زانستی وەربگرێت بۆ كردنەوەی دوو بەشی زانستی ( پەرستاری و كارگێڕی) لە شارۆچكەی پێنجوێن.

پ.ی.د. ئالان فەرەیدون علی ئەمین سەرۆكی زانكۆی پۆلیتەكنیكی سلێمانی لەلێدوانێكیدا تایبەت بە سایتی زانكۆ ووتی:

خۆشبەختانە ئەنجامی هەوڵەكانمان هاتە بەرهەم و  توانیمان دوو بەشی زانستی سەر بە پەیمانگای تەكنیكی سلێمانی لە قەزای پێنجوێن بكەینەوەو بۆ ئەمساڵی خوێندن خوێندكار وەردەگرێت، وێڕای پیرۆزبایی خۆی و ئەنجومەنی زانكۆی پۆلیتەكنیكی سلێمانی لە خوێندكاران و كەس و كاریان و خەڵكی بەشەرەفی شارۆچكەی پێنجوێن، هیوای خواست خەڵكی ئەو دەڤەرە و دەوروبەری سودی زیاتر لەو هەنگاوە نوێیە وەربگرن و وتیشی هەوڵ دەدەین لە داهاتودا ستافی پێویست و بینای گونجاو بۆ كردنەوەی پەیمانگایەك ئامادەبكەین .

هەروەها سەرۆكی زانكۆی پۆلیتەكنیكی سلێمانی ئاماژەی بەوەكرد كە ئەولەویەت بۆ خوێندكارانی دانیشتووی شارۆچكەی پێنجوێن و دەوروبەریەتی و كارئاسانیش بۆ ئەو خوێندكارانە دەكەین كە دەیانەوێت بە گواستنەوە لەو دوو بەشە درێژە بەخوێندن بدەن بەپێ ی هەمان پسپۆری خۆیان. باسی لەوەشكرد كە بۆ ئەمساڵی خوێندن بەهۆی كەمی بودجەی پێویست لەلایەن وەزارەتی داراییەوە نەمانتوانیوە بەشەناوخۆیی بۆ خوێندكاران ئامادەبكەین بەڵام هیوامان زۆرە بتوانین لەداهاتویەكی نزیكدا ئەو خزمەتگوزاریەش دابین بكەین سەرەڕای ئەوەی لە بودجەی سەرۆكایەتی زانكۆ ئەو بینایەی كەهەیە پارساڵ توانیمان نۆژەنی بكەینەوە.