وەزیری خوێندنی باڵا و توێژینەوەی زانستی: بۆ خوێندنی ماستەر و دکتۆرا کورسی خوێندنی تایبەت بۆ کەسوکاری شەهید و ئەنفالکراوان تەرخان دەکەین

  • تشرینی دووه‌م 12, 2019
  • 202 Views
وەزیری خوێندنی باڵا و توێژینەوەی زانستی: بۆ خوێندنی ماستەر و دکتۆرا کورسی خوێندنی تایبەت بۆ کەسوکاری شەهید و ئەنفالکراوان تەرخان دەکەین

ئەنجومەنی وەزارەتی خوێندنی باڵا و توێژینەوەی زانستی لە بەرامبەر خەبات و قوربانیدانی شەهیدان و ئەنفالکراوەکان لە مێژوی خەباتی ڕزگاریخوازی گەلەکەمان و، ڕەخساندنی دەرفەتی زیاتری خوێندن، بڕیاریدا له‌ كردنه‌وه‌ی خوێندنی باڵا/ ماستەر و دکتۆرا کەسوکاری پلە یەکی شەهید و ئەنفالکراوه‌كان (هاوسه‌ر، كوڕ و كچ) كورسی تایبه‌تیان بۆ ته‌رخان بكات، به‌مه‌رجێك هه‌ر كه‌سێك، كه‌ سەرجەم مەرجەکانی پێشکەشکردنی تێدا بێت و، لەتاقیکردنەوەی توانستی زانستی دەربچێت، ئه‌و بڕیاره‌ ده‌یانگرێته‌وه‌.

ئەمڕۆ سێشەممە ڕێکەوتی (12/11/2019) ئەنجومەنی وەزارەتی خوێندنی باڵا و توێژینەوەی زانستی بەسەرۆکایەتی د. ئارام محمد قادر و، به‌ئامادەبونی سەرۆکی زانکۆ حکومییەکان، کۆبونەوەی ژمارە (6) ساڵی (2019)ی ئەنجامدا و، چەند تەوەر و بابەتێکی پەیوەست بە پێشخستنی دۆخی خوێندنی باڵا-ی کوردستان دوای گفتوگۆكردن بڕیاریان له‌باره‌وه‌ درا.

لەسەرەتای کۆبونەوەکەدا، وەزیری خوێندنی باڵا و توێژینەوەی زانستی لە وتەیەکدا ئاماژەی بە ستراتیژ و، بەرنامەی کاری وەزارەت کرد و، ڕایگەیاند: کابینەی نۆیەمی حکومەتی هەرێمی کوردستان و، وەزارەتی خوێندنی باڵا و توێژینەوەی زانستی خاوەنی ڤیژن و دیدگا و، پلانی ڕونن بۆ گەشەپێدانی کەرتی خوێندنی باڵا لە هەرێمی کوردستان، هێڵە گشتییەکانی پلانی حکومەت بەڕونی لە کارنامەی کابینەی نۆیەمدا ئاماژەی پێکراوە و، وردەکاری پلانی چوار ساڵی وەزارەتەکەشمان “بەڕاوێژ لەگەڵ زانکۆ و دامەزراوەکانی خوێندنی باڵا ” گەڵاڵە کراوە، بۆ ئەوەش وتی: باوەڕمان وایە کە وەبەرهێنانی زیاتر لە کەرتی خوێندنی باڵا فاکتەری سەرەکی بونیادنانی ئابووریەکی گەشەکردو و، کۆمەڵگەیەکی ئارام و، سیستمێکی سیاسی و کۆمەڵایەتی ئابوری سەقامگیرە لە هەرێمەکەمان، وتیشی: ئێمە کار بۆ بەرزکردنەوەی کواڵیتی خوێندن و فێرکردن و توێژینەوەی زانستی لە زانکۆکانمان ده‌كه‌ین.

لەبارەی بڕگەی پێداچوونەوە بە بەرزکردنەوەی پلەی زانستی دوای پێشکەشکردنی ڕاپۆرتی لێژنەی تایبەتمەند بەو بوارە، کە لەماوه‌ی ڕابردودا کارەکانیان ئەنجامدابو، ڕاپۆرتی خۆیان پێشکه‌ش بە ئەنجومەنی وەزارەت کرد و، تێیدا بۆچونەکانی لێژنەی تایبەت بەو بوارە خرایه‌ڕوو، دوای ئەنجامدانی گفتوگۆی وردی زانستی و بابەتیانە و، پێشکەشکردنی بۆچونەکان لەبارەی ئەنجامدانی توێژینەوەی زانستی و، ڕیزبەندی گۆڤارە زانسیتەکان بۆ هەژمارکردنی پلەی زانستی و، گونجاندنی لەگەڵ پێشکەوتنەکانی سەردەم، ئەنجومەنی وەزارەت بڕیاریدا لەڕێگەی لێژنەیەکەوە تێبینی و، سەرنجەکان گەڵاڵە بكرێ و، لە کۆبوونەوەکانی داهاتو ئەنجومەنی وەزارەت پەسەندی بکرێ.

سەبارەت بە خاڵێکی دیکەی بەرنامەی کاری کۆبونەوەی ئەنجومەنی وەزارەت، کە تایبەت بو بەداواکاری کەسوکاری شەهیدان و ئەنفالکراوان بۆ دابینکردنی کورسی خوێندنی باڵا/ ماستەر و دکتۆرا، سەرەئه‌نجام ئەنجومەنی وەزارەتی خوێندنی باڵا و توێژینەوەی زانستی بڕیاریدا لە بەرامبەر خەبات و قوربانیدانی شەهیدان و ئەنفالکراوان لە مێژوی خەباتی ڕزگاری خوازی گەلەکەمان، هەروەها بۆ پێدانی دەرفەت و ڕەخساندنی هەلی زیاتر، کەسوکاری پلەیەکی شەهید و ئەنفالکراوه‌كان (هاوسه‌ر، كوڕ و كچ)،‌ ئەگەر سەرجەم مەرجەکانی پێشکەشکردنی خوێندنی ماستەر و دکتۆرای تێدا بێت و، لە تاقیکردنەوەی توانستی زانستی دەربچێت، به‌ده‌ر له‌ پلانی ئاسایی وه‌رگرتن کورسی خوێندنی تایبەتیان بۆ تەرخان بکرێت، واتا ناچنه‌ پێشبڕكێی پێشكه‌شكارانی دیكه‌.

د.ئارام محمد قادر وەزیری خوێندنی باڵا و توێژینەوەی زانستی ئەم بڕیارەی ئەنجومەنی وەزارەتی بەگرنگ بۆ کەسوکار و بنەماڵەی شەهیدان و ئەنفالکراوان وەسفکرد و، ڕایگەیاند: خزمەتکردن و ڕێزگرتن لە بنەماڵه‌ی شه‌هیدان و ئه‌نفالکراوه‌كان ئەرکێکی گرنگ و پڕ شانازییە ئەگەر بتوانین خزمەتیان بکەین.

هەر لە کۆبونەوەکەدا، چەند بابەت و تەوەرێکی دیکەی پەیوەست بە بواری زانستی و خوێندکاران و کارگێڕی له‌ زانکۆ و دامەزراوە زانستیەکانی هەرێمی کوردستان گفتوگۆیان لەبارەوە کرا و، بڕیاری پێویستیان له‌سه‌ر درا.

راگەیاندنی وەزارەتی خوێندنی باڵا و توێژینەوەی زانستی