زانكۆی پۆلیتەكنیكی سلێمانی بەچەند چالاكییەك یادی دامەزراندنی شاری سلێمانی پیرۆزكرد

  • تشرینی دووه‌م 14, 2019
  • 305 Views
زانكۆی پۆلیتەكنیكی سلێمانی بەچەند چالاكییەك یادی دامەزراندنی شاری سلێمانی پیرۆزكرد

ڕۆژی 11/14 ی هەموو ساڵێك وەك ڕۆژی دامەزراندنی شاری ئەدیبان و شاعیران و پایتەختی رۆشنبیری ، شاری سلێمانی دەستنیشانكراوە.

بۆ بەرز ڕاگرتنی یادی 235 ساڵەی دامەزراندنی شاری سلێمانی و بەزیندوهێشتنەوەی كلتورو مێژووی خەڵكی شارە حەیاتەكە كاتژمێر 10 ی سەرلەبەیانی ئەمڕۆ پێنجشەممە  2019/11/14 پڕۆژه‌ی تۆڕی كه‌له‌پووری كولتووری سه‌ر به‌ گروپی توێژینه‌وه‌ی زانكۆی پۆلیته‌كنیكی سلێمانی بەهاوبەشی لەگەڵ كۆمەڵێك ڕێكخراوی مەدەنی شاری سلێمانی هەستان بە سازكردنی مەراسیم و كەرنەڤاڵێكی قەشەنگ كە جەماوەرێكی زۆرو كەسایەتییە دییارەكانی شاری سلێمانی تیایدا بەشداربوون، سەرەتا لە ماڵی كلتوری صۆفی كەریم لەگەڕەكی صابونكەران لەچەندین بڕگەو بەشی جیاجیادا كلتورو كەلەپوری شاری سلێمانی و كاری دەستی پیاوان و خانمان و چەندین بابەتی مێژوویی و پێشكەشكردنی خواردنە كوردەوارییەكان پێشكەشكران لەگەڵ دەهۆڵ و زوڕناو چەند گۆرانییەكی ڕەسەنی تایبەت بەشاری سلێمانی.

لەم چالاكییەدا پ.ی.د. ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی بەشداری كرد و سەرسامی خۆی بە سەرجەم نمایشەكان دەربڕی و لە ووتەیەكیدا تایبەت بەسایتی زانكۆی پۆلیتەكنیكی سلێمانی ووتی:

جێ ی خۆشحاڵییە ئەمڕۆ بەشدارین لەم ڕۆژە پیرۆزەدا كە یادی دامەزراندنی شاری سلێمانییە لەلایەن ئیبراهیم پاشای بابانەوە بەردی بناغەی بۆ دانراوە و ئێمەش وەك زانكۆی پۆلیتەكنیكی سلێمانی لەچەند بۆنەو مەراسیمێكی تایبەت بەم ڕۆژە چالاكیمان هەیە، سەرۆكی زانكۆی پۆلیتەكنیكی سلێمانی لە درێژەی ووتەكەیدا ووتی شاری سلێمانی لەپاش دامەزراندنیەوە  فراوانبوون و پێشکەوتنێکی بەرچاوی بەخۆوە بینیوە و ئێستا وەک یەکێک لە شارە ھێمن و خاوێنەکان لە عێراق و ناچەكەشدا بەناوبانگە. هەروەها جێ ی سەربەرزیمانە كە لەلایەن ڕێكخراوی یونسكۆشەوە بە شاری داهێنانی ئەدەبی ناسێنراوە جگە لەوەی كە پایتەختی ڕۆشنبیری كوردستانە، سلێمانی لە شۆڕشی نەتەوەییماندا پێگەیەكی توندو تۆڵی هەیەو هەزارەها شەهیدی بەخشیوەتە ڕێگای ڕزگاری كوردستان. لە ڕووی زانست و مەعریفەشەوە سلێمانی یەكێكە لە شارە گرنگەكان كە لەئێستادا ژمارەیەك زانكۆی حكومی و ئەهلی تیادایەو ساڵانە بە هەزاران خوێندكاری بەتوانا بەرهەم دەهێنێت. لێرەدا ناتوانرێت باس لەهەموو ئەو هەنگاوانە بكرێت كە شاری سلێمانی و سلێمانییەكان هەڵیانگرتووە بەڵام شاری سلێمانی لەهەموو سێكتەرە جیاوازەكاندا ئەسپی خۆی تاو داوەو هیچ بوارێك نابینم دەستی ڕەنگین و بەسەلیقەی خەڵكی سلێمانی تیادا نەبێت. لەكۆتایی ووتەكەیدا سەرۆكی زانكۆی پۆلیتەكنیكی سلێمانی پیرۆزبایی خۆی لە سەرجەم خەڵكی بەشەرەفی شاری سلێمانی دەكات و ئەخوازێت ساڵ لەدوای ساڵ شاری سلێمانی پێشكەوتنی جۆری بەخۆیەوە ببینێت لەسایەی خەڵكە بەتواناو زانستخوازو زیرەكەكەیەوە.

هەروەها د.ڕۆژین كمال محمد ئەمین سەرۆكی پڕۆژه‌ی تۆڕی كه‌له‌پووری كولتووری سه‌ر به‌ گروپی توێژینه‌وه‌ی زانكۆی پۆلیته‌كنیكی سلێمانی ووتی : جێ ی شانازییە توانیمان دەستمان لەم یادكردنەوەیەدا هەبێت و بەچەندین چالاكی هاوبەش بەشدارین، ئەمێدی خواست شاری سلێمانی ڕۆژ لەدوای ڕۆژ پێشكەوتن لەهەموو بوارە جۆراو جۆرەكاندا بەدەست بهێنێت هەروەك چۆن لەڕابردوودا پێشەنگ بوەو یەكێكە لەشارە جوان و داهێنەرو نمونەبییەكان و جگە لەوەی لانکەی ڕۆشنبیران و تێکۆشەران بووە، مەڵبەندی ھەڵگیرسانی چەندان شۆڕش و ڕاپەڕینیش بووە لە مێژووی کوردستاندا.. لەكۆتایی وتەكەیدا سەرۆكی پڕۆژه‌ی تۆڕی كه‌له‌پووری كولتووری سه‌ر به‌ گروپی توێژینه‌وه‌ی زانكۆی پۆلیته‌كنیكی سلێمانی پیرۆزبایی لە گشت خەڵكی شاری سلێمانی دەكات و هیوادارە یادكردنەوەكەیان جێ ی ڕەزامەندی خەڵكی شار بێت.

پاشان كاتژمێر 2 ی پاش نیوەڕۆی ئەمڕۆ لە هۆڵی سەنتەری ڕۆشنبیری سەرا هەر بەو یادە پڕ شكۆیەوە كۆڕێكی بەجۆش و خرۆش بۆ ژمارەیەك لە كەسایەتییەكانی شاری سلێمانی و شاعیران و هونەرمەندان سازكراو لەلایەن هەردوو شاعیری ناوداری گەلەكەمان ( ئیسماعیل خورماڵی و محمد پاكژ) كۆمەڵێك شیعرو شانامە بەباڵای شاری سلێمانیدا خوێنرایەوەو دوابەدوای ئەوە خەڵات بەسەر ئامادەكاران و بەڕێوەبەرانی مەراسیمەكە دابەشكراو 12 قات جلی كوردیش كرایە دیاری بە شاعیرانی شاری هەڵمەت و قوربانی. لە كۆتاییدا چەندین ئاوازی خۆش و گۆرانی ڕەسەنی كوردی پێشكەش بە ئامادەبوان كران.