لیژنەی باڵای ئامادەكاری خوێندنی ئۆنلاینی زانكۆ كۆبونەوە

  • 2020-03-25
  • 927 Views
لیژنەی باڵای ئامادەكاری خوێندنی ئۆنلاینی زانكۆ كۆبونەوە
بەئامانجی تاوتوێكردنی چەند پرسێكی گرنگ لەبواری خوێندندا و بەتایبەتتر پرۆسەی خوێندنی ئۆنلاین لە كۆلیج و پەیمانگاكانی سەر بەزانكۆی پۆلیتەكنیكی سلێمانی بە سەرپەرشتی سەرۆكی زانكۆو بەئامادەبوونی سەرۆك و ئەندامانی لیژنەی باڵای خوێندنی ئۆنلاین لەزانكۆی پۆلیتەكنیكی سلێمانی لەڕێگەی google meet ئۆنلاینەوە كۆبونەوەی خۆیان ئەنجامدا.
ئەمڕۆ سێشەممە 24 ی ئاداری 2020 بەسەرپەرشتی پ.ی.د. ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی و بەئامادەبوونی سەرۆك وئەندامانی لیژنەی باڵای خوێندنی ئۆنلاین لە زانكۆی پۆلیتەكنیكی سلێمانی، لەڕێگەی ئۆنلاینەوە كۆبونەوە، ئەمەش لەدوای ئەوە هات كە ڤایرۆسی كۆرۆنا بەشێوەیەكی بەربڵاو هەرێمی كوردستانی گرتەوەو بەمەبەستی پاراستنی گیانی هاوڵاتیان و خوێندكارانی ئازیز بەبڕیارێكی ئەنجومەنی باڵای ڕوبەڕوبونەوەی ڤایرۆسی كۆرۆنا لە هەرێمی كوردستان بڕیار لەسەر ڕاگرتنی خوێندن درا لەسەرجەم ئاست و قۆناغەكانی خوێندن ، هەر بۆ ئەو مەبەستەش لەماوەی ڕابردوودا ئەنجومەنی زانكۆی پۆلیتەكنیكی سلێمانی سەرجەم ئامادەكارییەكانی بۆ خوێندنی ئۆنلاین لە كۆلیج و پەیمانگاكاندا تەواو كردوەو لیژنەی تایبەتمەندی پێكهێناوە بۆ پەیڕەوكردنی ئەو پرۆسەیە ،كە خۆشبەختانە سەرجەم ئامادەكارییەكان تەواوكراون و دەتوانرێت دەست بەپرۆسەكە بكرێت ئەمەش وەك پاڵپشتییەكە بۆ خوێندنی زانكۆكان كە هەوڵ بدرێت خوێندكاران لە خوێندن دانەبڕیت تا لەم دۆخە نەخوازراوە ڕزگارمان دەبێت.
لەكۆبونەوەكەدا میكانیزمی ئامادەكاری پرۆسەی خوێندنی ئۆنلاین خرایە بەرباس وەك یەكێك لە بژاردەكانی بەردەوام بوونی پرۆسەی خوێندن لە زانكۆی پۆلیتەكنیكی سلێمانی بەپێ ی ڕێنماییەكانی وەزارەتی خوێندنی باڵاو توێژینەوەی زانستی حكومەتی هەرێمی كوردستان.
شایانی وتنە كە لەماوەكانی رابردوودا زانكۆی پۆلیتەكنیكی سلێمانی سیستمی خوێندنی ئۆنلاین وسیستمی زانكۆی ئەلیكترۆنی و فیدباكی ئۆنلاین و پەیوەندی نێوان مامۆستاو خوێندكار و هەروەها پەیوەندی نێوان مامۆستایان و مامۆستایان و كاروباری كارگێڕی و زانستی ئامادەكردووە.