زانكۆی پۆلیتەكنیكی سلێمانی و زانكۆیەكی ئەمریكی رێككەوتنێك ئیمزا دەكەن

  • تشرینی دووه‌م 18, 2019
  • 40 Views
زانكۆی پۆلیتەكنیكی سلێمانی و زانكۆیەكی ئەمریكی رێككەوتنێك ئیمزا دەكەن

لە چوارچێوەی هەوڵە بەردەوامەكان بۆ فراوانكردنی پەیوەندییە ئەكادیمییە نێودەوڵەتییەكان و دوای زنجیرەیەك گفتوگۆو بیروڕا گۆڕینەوە، زانكۆی پۆلیتەكنیكی سلێمانی و زانكۆی میزۆری ستەیت لە ئەمریكا رێێكەوتنێكیان ئیمزا كرد.

لەبارەی ناوەرۆكی رێككەوتنەكەوە، شیروان حامد بەرێوەبەری بەڕێوەبەرایەتی پەیوەندییە نێودەوڵەتییەكانی زانكۆی پۆلیتەكنیكی سلێمانی رایگەیاند رێككەوتنەكە بۆ فراوانكردنی ئاڵوگۆڕە ئەكادیمییەكانی زانكۆو دروستكردنی پەیوەندییە لەگەڵ زانكۆ پێشكەوتووەكانی جیهانی هاوچەرخ. هەروها راشیگەیاند بەپێی ناوەرۆكی ماددەی دوو لە رێككەوتنەكە هەردوو زانكۆ پرۆگرامی خوێندنی هاوبەشیان دەبێت بەجۆرێك بەپێی ئەم پرۆگرامە خوێندكارانی زانكۆی پۆلیتەكنیكی سلێمانی دەتوانن سیسمستەرێك یان تا ساڵێك درێژە بە خوێندنەكەیان لە پسپۆڕێتییە جیاوازەكان بدەن لە زانكۆی میزۆری ستەیت و پاشان بۆیان هەیە خوێندنی ماستەر لە هەمان زانكۆ تەواو بكەن. هەروەها خوێندكارانی خوێندنی باڵای هەردوو زانكۆ بۆیان هەیە كۆرسێكی خوێندنەكەیان یان لە زانكۆی پۆلیتەكنیكی سلێمانی یان زانكۆی میزۆری ستەیت تەواو بكەن. بەپێی ماددەی 2 و 3ی رێككەوتنەكە ئەو خوێندكارانەی بە پرۆگرامی هاوبەش بەكالۆریۆس یان ماستەرەكەیان تەواو دەكەن لەلایەن زانكۆی میزۆری ستەیتەوە سكۆڵەرشیپی تایبەت بە هاوبەشەكانی زانكۆ ئەمریكییەكە وەردەگرن.

جێی باسە رێككەوتنەكە چەندین خاڵی تری گرنگ لەخۆ دەگرێت وەك ئەوەی خوێندكارانی زانكۆی پۆلیتەكنیك دەتوانن بەشداریی كۆرسی فێربوونی زمانی ئینگلیزی لەزانكۆی میزۆری بكەن و سكۆڵەرشیپی تایبەت لەلایەن سەنتەری زمانی زانكۆ ئەمریكییەكە وەربگرن و خوێندكارانی ئەو زانكۆ ئەمریكیەش دەتوانن بەشێكی خوێندنەكەیان لە زانكۆی پۆلیتەكنیكی سلێمانی تەواو بكەن. هەر لە رێككەوتنەكەدا خاڵێك تەرخانە بۆ كردنەوەی خولی راهێنان بۆ ستافی هەردوو زانكۆ ئەویش لە ئەمریكاو هەرێمی كوردستان. بەپێی یەكێكی تر لە مادەكانی رێككەوتنەكە زانكۆی پۆلیتەكنیكی سلێمانی دەتوانێت داوای كردنەوەی خولی تایبەت بۆ خوێندكاران و دەرچووان و ستافی كۆلێژەكانی بكات لە زانكۆ ئەمریكییەكە.

زانكۆی میزۆری ستەیت زانكۆیەكی حكومییە و كەمپی سەرەكی زانكۆكە لە شاری سپرینگفێڵدە لە ویلایەتی میزۆری. ئەم زانكۆیە لە ساڵی 1905 دامەزراوەو لەسەر ئاستی ویلایەتی ناوبراو دووەمین گەورەترین زانكۆیە و تا پایزی ئەمساڵ 26 هەزار خوێندكار لەم زانكۆیە درێژە بە خوێندن دەدەن. لە رووی رانكینەوە زانكۆی میزۆری ستەیت لەسەر ئاستی ئەمریكا رانكی لە نێوان 290 بۆ 380 دایە.