سەرۆكی زانكۆی چەرمۆ ستایشی هەوڵەكانی سەرۆكی زانكۆی پۆلیتەكنیكی سلێمانی دەكات

  • تشرینی دووه‌م 19, 2019
  • 322 Views
سەرۆكی زانكۆی چەرمۆ ستایشی هەوڵەكانی سەرۆكی زانكۆی پۆلیتەكنیكی سلێمانی دەكات

بەمەبەستی پتەوكردنی پەیوەندییە زانستی و دۆستانەكانی هەردولا ئەمرۆ سیشەممە 2019/11/19 پ.ی.د. دانا احمد یاریدەدەری سەرۆكی زانكۆی پۆلیتەكنیكی سلێمانی بۆ كاروباری كارگێڕی و دارایی كەبە نوێنەرایەتی پ.ی.د. ئالان فەرەیدون عەلی ئەمین و د. ئەیوب خەسرەو ڕاگری پەیمانگای تەكنیكی چەمچەماڵ سەردانی سەرۆكایەتی زانكۆی چەرمۆی كرد و لەلایەن پ.د. صلاح رەزا سعید سەرۆكی زانكۆو ئەندامانی ئەنجومەنی زانكۆوە بەگەرمی پێشوازی لێكرا.

لەسەردانەكەدا یاریدەدەری سەرۆكی زانكۆی پۆلیتەكنیكی سلێمانی سلاوو ریزی سەرۆكی زانكۆی گەیاندە سەرۆك و ئەندامانی ئەنجومەنی زانكۆی چەرمۆو ڕایگەیاند هەردوو زانكۆ مێژوویەكی پرشنگدارمان لەكاری هاوبەشی زانستی دا هەیەو دەخوازین هەماهەنگی و پەیوەندییەكانمان تا دێ فراوانتر ببێت بەئاراستەی خزمەتگەیاندن بەڕەوتی خوێندنی باڵا لەسنوری پارێزگای سلێمانیدا و هەروەها باسی لەوەش كرد كە هەموو لایەك قەرزاری خەڵكی ئەنفالكراوی ئەم ناوچەیەن و لەسەریانە هەرچیەكیان پێبكرێت خزمەتی بكەن.

لەبەرامبەردا پ.د. صلاح رەزا سعید سەرۆكی زانكۆی چەرمۆ بەناوی خۆی و ئەنجومەنی زانكۆكەیەوە بەخێرهاتنی گەرمی یاریدەدەری سەرۆكی زانكۆی پۆلیتەكنیكی سلێمانی كرد و دوپاتی كردوە كە زانكۆكەیان هەمیشە سوپاسگوزاری هەوڵە بەردەوامەكانی پ.ی.د. ئالان فەرەیدون و زانكۆی پۆلیتەكنیكی سلێمانییە كە بەتایبەت لە دوای سوتاندنی بەشێك لە بینای سەنتەری توێژینەوەی زانكۆی چەرمۆ یەكەم زانكۆ بوون كە دەستی هاوكاریان گەیاندە زانكۆی چەرمۆو توانیان لەسەر بودجەی خۆیان بینا سوتاوەكەمان بۆ نۆژەن بكەنەوە بە دروستكردنی دوو تاقیگەی نوێوە كە جێ ی سوپاس و پێزانینە، هەروەها ڕایگەیاند چەندین كاری هاوبەشمان كردوە لە كردنەوەی خوێندنی باڵا (دكتۆراو ماستەر) لەنێوان هەردولادا و ئێستاش خوێندنی دبلۆمی باڵا دەكەینەوە ، هیوای خواست تادێ كارەكانیان درێژە پێبدەن و هەماهەنگییەكان فراوانتر بكەن چونكە لەكۆتاییدا خوێندكارانی ئەم هەرێمە سوودمەند دەبێت و ڕەوتی خوێندنی باڵا بەرەو پێش دەروات، دوبارە سوپاسی خۆی ئاراستەی زانكۆی پۆلیتەكنیكی سلێمانی كرد لەبەرامبەر بەدەنگەوە هاتنیان و هاوكاریكردنیان.

وە لەمەراسیمێكدا بینا نۆژەنكراوەكەی زانكۆی چەرمۆ كرایەوە.

پاشان ڕێزلێنانی زانكۆی چەرمۆ پێشكەش بە هەریەكە لە پ.ی.د. ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی و پ.ی.د. دانا احمد یاریدەدەری سەرۆكی زانكۆ بۆ كاروباری كارگێڕی و دارایی كرا .

لەكۆتایی سەردانەكەیاندا یاریدەدەری سەرۆكی زانكۆ بۆ كاروباری كارگێڕی و دارایی پەیمانگای تەكنیكی چەمچەماڵیان بەسەركردەوەو لەلایەن د. ایوب خسرەو مامۆستایان پێشوازیان لێكراو باس لە ڕەوتی خوێندن و چالاكییەكانی پەیمانگاكە كراو بەڵێنیان پێدرا هەر كەم و كوڕییەكیان هەبێت بە زوترین كات بۆیان چارەسەر بكرێت.