زانکۆى پۆليتەكنيكى سلێمانى پلەی دووەمى لەسەر ئاستی روژهەڵاتى ناوەراست بەدەستهێنا

  • 2020-12-27
  • 1106 Views
زانکۆى پۆليتەكنيكى سلێمانى پلەی دووەمى لەسەر ئاستی روژهەڵاتى ناوەراست بەدەستهێنا

خوێندکارێکی زانکۆی پۆلیتەکنیکی سلێمانی لە پێشبرکێی کۆمپانیای هواوی جیهانی کە لەسەر ئاستی رۆژهەڵاتی ناوەڕاست رێکخرابوو، پلەی دووەمى لەسەر ئاستی روژهەڵاتى ناوەراست بەدەستهێنا و بەنوێنەرایەتی تیمی عێراق بۆ بەشداریکردن لەپێشبڕکێی جیهانی Huawei ICT کە بڕیارە ساڵی ئایندە بەڕێوەبچێت، دەستنیشانکرا.

رۆژی 26-12-2020 پێشبڕکێی کۆمپانیای هواوی جیهانی بەشێوەی ئۆنلاین لەسەر ئاستی رۆژهەڵاتی ناوەڕاست بەبەشداری (١٣) تیم لە (١١) وڵات بەڕێوەچوو، تێیدا بۆ ماوەی ٧ کاتژمێرو لەتاقیکردنەوەیەکی ئۆنلایندا خوێندکاری زانکۆی پۆلیتەکنیکی سلێمانی (بیلال محەمەد حامد ) لەبەشی نێتوەرک لە کۆلێجی تەکنیکی ئینفۆرماتیک پلەی دووەمى لەسەر ئاستی روژهەڵاتى ناوەراست بەدەستدەهێنا و هەڵبژێردرا بۆ نوێنەرایەتی تیمی هەڵبژاردەی عێراق، لەگەڵ دوو خوێندكارى ديكه لەزانکۆکانی سەڵاحەدین و موسڵ، بەو ئەنجامەش تیمی عێراق سەرکەوت، بۆ بەشداریکردن لەپێشبڕکێیەکی جیهانی وەکو نوێنەرایەتی رۆژهەڵاتی ناوەراست، کە ئەمەش دەستکەوتێکی گەورەی دیکەی زانستى نێودەوڵەتى زانکۆمانە.
لەبەرامبەردا سەرۆکایەتی زانکۆی پۆلیتەکنیکی سلێمانی پڕبەدڵ پیرۆزبايى لەسەرجەم مامۆستایان و خوێندكارانى کۆلێجی تەکنیکی ئینفۆرماتیک و تەواوی خوێندکارانی زانکۆ دەکات، بەتايبەتى بەشى نێتوەرک و خوێندکاری ناوبراو، وە هيواى سەلامەتى و تەندروستى باش بۆ هەموولايەك دەخوازێت و هەموو پشتیوانی و هاوکارییەك بۆ خوێندکارانی زانکۆ دووپاتدەکاتەوە.

شایەنی باسە بەبەشداری زیاتر لە ( 15000 ) خوێنکار لە ( 400 ) زانکۆی جیاواز لەرۆژهەڵاتی ناوەڕاست، پێشبڕکێی هواوی بۆ تەکنۆلۆجیا و زانیاری Huawei ICT Competition ME 2020 بەڕێوەچوو، لەعێراق 963 خوێندكار لە 25 زانکۆ بەشداربوون لەپیشبڕکێکەدا، دوای دوو تاقیکردنەوە ( 3 ) خوێندکار سەرکەوتن بۆ قۆناغی کۆتایی، وەکو تیمی عێراق، لەگەڵ وڵاتانی ئوردن و لوبنان و وڵاتانی کەنداو و پاکستان، لەپێشبڕکێی کۆتاییدا 13 تیم بەشداربوون، کە نوێنەرایەتی ( 10 ) وڵاتیان دەکرد، تیمی عێراق کە پێکهاتبوون لەخوێنکاران (بیلا مەحەمەد حامد لەزانکۆی پۆلیتەکنیکی سلێمانی و ابراهیم عمر ابراهیم لەزانکۆی سلاحەدین، حارث محمود/ زانکۆی موسڵ) توانیان پلەی دووەمی پێشبڕکێکە بەدەستبهێنن لەسەر ئاستی رۆژهەڵاتی ناوەڕاست و تیمی عێراق بەشداربێت لەپێشبڕکێی جیهانی Huawei ICT کە بڕیارە مانگی 5ی 2021 بەڕێوەبچێت.